Republic Day lawm turin inbuatsaih

Republic Day vawi 72-na lawm tura inbuatsaihna chu peihfel a ni tawh a, mahse hripui leng vangin kum dang anga ropuiin lawm theih a ni dawn lo. 

Kumina hian kum 50 chhunga a ṭum khatna atan Republic Day lawmnaah hian khuallian a awm dawn lo. Britain prime minister Boris Johnson chu khuallian tur atan hian sawm a ni a, ani pawhin rem a tih vek hnuah an rama hri chi thar a len avangin a rawn zin tum hi a ṭhulh a ni. Hei vang hian khuallian awm loin lawm a ni dawn ta a ni. Kum  1952, 1953 leh 1966 te khan khuallian awm loin hman a lo ni tawh bawk. 

Thawhleni zing dar 9-ah hnam puanzar pawhpharh a ni dawn a, parade-in a zui nghal ang. 

Kumin Republic Day lawmna hi a hmunah mi 25,000 in an thlir phalsak an ni. Nikum khan Rajpath-a a lawmna neihna hmunah hian mi 1,50,000 an kal a ni. Media aiawh kal thei zat tur pawh 300 aṭangin 200 ah tihtlem a ni a, naupang kum 15 hnuai lam kal phal a ni lo bawk. 

Republic Day parade hi Rashtrapati Bhavan aṭanga India Gate thleng neih a ni ang. Kuminah hian a ṭum khatna atan parade-ah Rafale fighter jet te an tel dawn a, India rama hmeichhe fighter pilot hmasa ber Bhawna Kanth pawh inlan tur niin Bangladesh Armed Forces-te an tel dawn bawk.  

Kum danga mipui mit la tu leh lawm hlawh tak, motorcyle stunt erawh kuminah chuan entir a ni dawn lo. Hei bakah hian social distancing dan kenkawh a ngaih avangin gallantry award dawngtu leh naupang huaisen lawmman dawngtute pawh Parade-ah hian an tel dawn lo. 

State hrang hrang leh ministry pakua-ten tableau an pho lang leh dawn bawk, a ṭum khatna atan Ladakh union territory pawh inlanin,Thikse monastery leh an culture pholanna tableau a rawn siam dawna ni.