Mi nuai 16 hnenah vaccine pe tawh

India ram puma January 16 aṭanga Covid-19 vaccine pek chhuah chu healthcare leh frontline worker mi nuai 16 dawn hnenah pek a ni tawh. 

Vaccine pek chhuah ṭan aṭanga ni ruk chhungin mi nuai 10 in vaccine hi an dawng hman a, vaccine lo pe chhuak hmasa zawk, US leh UK aiin ni ruk chhungin an pe chhuak hnem zawk a ni. US hian ni 10 chhungin mi nuai 10 hnenah vaccine hi a pe hman a, UK hian ni 18 chhungin a pe hman thung. 

Inrinni zan thleng khan vaccine dawn tawh hi mi nuai 15.82 an awm a, vaccine dawng tawh zingah hian harsatna nei 1,238 report awmin, hei hi vaccine dawng tawh zawng zawng aṭanga tehin 0.08% an ni. Vaccine la tawh zinga 11, 0.0007% chu harsatna an neih avang hian damdawi-inah dah luh an ni bawk. 

Union health ministry chuan vaccine la tawh zinga healthcare worker paruk chu vaccine an lak hnuah an thi tih a sawi a, mahse an thihna chhan hi Covid-19 vaccine nena inkaihhnawihna nei lo a ni, a ti.