Modi-Jinping Summit

Prime minister Narendra Modi leh China president Xi Jinping chuan informal summit ṭum hnih­na chu Inrinni khan an zo fel. Kawng hrang hrangah lungrual taka an thawhdun theihna turin an ngaihdan leh an thlirdante an inhrilh tawn a ni.

Khawvel huap leh ram pahnih chhehvel huap ang pawha buaina chinfelna tur daih rei zawk leh awmze nei zawk pawimawhna chungchangte sawiin, ram pahnih inbiaknain khawvel huap ang pawha nghawng a neih theih dan chungchangte an sawi.

Inrinni khan ram pahnih hruai­tute hian darkar khat chuang zet chu an pahniha inkawmna hun bik an hmang a, hemi hnu hian ram pahnih aiawhte chuan delegation-level talk an neih chhunzawm bawk. Delegation-level talk-ah hian prime minister Narendra Modi chuan Wuhan Spirit-in ram pahnih inkara inrintawnna leh inhriatreng-na tur a pek dan chungchang sawiin, Chennai Vision an hmuh chuan thawhdunna kawngah bung thar a kaitir tih a sawi. Wuhan Summit chuan awmze neia inbiakna kawngah ram pahnih chu hma a sawntir tih sawiin, an inhriatthiam tawn lohnate chu inhuatnaah chantir loin chinfel an remti dun tih a sawi bawk. 

Modi chuan hmasang hun aṭang tawhin India leh China chu khawvela economic power lian an ni tawh tih sawiin, ram pahnih hian tunah hian hei hi an nei let leh mek tih a sawi. President Xi Jinping pawhin Tamil Nadu sorkar, a mipuite leh India sorkarin an lo lawmna chu lawmawm a tih thu sawiin hriatreng tlak a nih thu a sawi bawk.

Inbiakna an neih zawh hian silk saree tah lai entir an ni a, hemi zawh hian handicrafts exhibition an tlawh zui a, thilpek an inpe tawn bawk a ni. Thuthar thehdarhtuten an kawmnaah Foreign Secretary Vijay Gokhale chuan ram pahnih hruaitute chuan darkar ruk vel zet inbiakna an neih thu leh, China chuan insumdawn tawnna kawngah India nena an thawhdunna chu hmasawn tir zel an duh tih a sawi.

Sumdawnna lamah chuan mumal taka thawhdunna ram pahnihten an hlawkna tura Regio­nal Comprehensive Economic Partnership hlawkthlak leh inbuk tawn neihna tura inbiakna neih an remti tih a sawi bawk. High-Level Economic and Trade Dialogue mechanism siam an remti ve ve tih sawi bawkin, Kashmir chungchang erawh an sawi lang lo tih a sawi. Firfiakna erawh an duh lo hle tih sawi bawkin, international community-ah pawh nasa zawka do an nih theihna tura sawichhuah an remti ve ve bawk a ni.

Ramri chungchangah pawh inremna tluantling a awm theihna turin Special Representative siam an remti bawk a, hemi kawngah hian inring tawn zawka thawhdun an remti bawk. Tamil Nadu leh Fujian Pro­vince inkara sister-state relation siam an remti a, nakkum 2020 hi Year of India-China Cultural and People to People Exchange-a puan an remti bawk a ni. Hemi pual hian activity 70 buatsaih an remti.

Modi leh Jinping hian Chennai bul lawka awm ancient port town- Mamallapuram-ah inbiakna hi an nei a ni.