Muslim hlim berte chu India-a awmte an ni : RSS chief
Rashtriya Swayamsevak Sangh (RSS) chief Mohan Bhagwat chuan khawvela Muslim zinga hlim ber berte chu India rama awmte an ni, a ti. Hei hi Hindu culture vang a ni tih a sawi nghal bawk.
Mohan Bhagwat hi RSS hnuaia thuneitu sang, Akhil Bharatiya Karyakari Mandal meeting hmang turin Odisha-ah a zin a ni. Meeting hi Oct. 15-20 chhung neih a ni ang. RSS hotu chu sakhua, ṭawng emaw ram emaw a ni lo tih sawiin, "India rama cheng zawng zawngte culture a ni," a ti. Kawng dik lo zawh ramte chuan India ramah kawng dik zawngin an rawn kal ṭhin, tiin a sawi.
"Juda-te kha an vahbo khan India ram chauh chu inhumna an hmuhna ram a ni. Parsis-te khan India ramah zalen takin an sakhua an kalpui bawk. Muslim zinga hlim ber berte chu India rama chengte an ni. Hei hi a chhan chu Hindu kan nih vang a ni," a ti. India rama cheng tam tak chuan Hindu an nihna chu sawichhuah an zak ṭhin a, ṭhenkhat chuan chhuang takin Hindu an nih thu an sawi thung, tiin Bhagwat chuan a sawi.
India ram chu Hindu ram a ni tiha RSS dinna chu a la ngai reng a ni tiin, "Bharat chu Hindustan, Hindu Rashtra a ni," a ti. India rama awm, ram ropuina tur leh remna leh muanna a awm theihna tura thawktu, hnam leh ze hrang hrangte inzahtawna lo lawmtu, Bharatiyas zawng zawng chu Hindu vek an ni, a ti.