Kashmir Valley-ah Postpaid mobile service tinung

Thla hnih chuang zet service tihtawp a nih hnuin, nimin khan Kashmir Valley-ah postpaid mobile service chu tihnun a ni leh ta. 

Jammu & Kashmir Planning Com­mission Principal Secretary Rohit Kansal chuan press conference a neihnaah, nimin chhun dar 12 aṭang khan Kashmir Valley-a mipuite hman theih turin postpaid phone service tihnun a nih leh tak thu hi a sawi a ni. Rohit Kansal hian prepaid mobile connection leh internet service erawh tihnun a la ni ve lo tih sawiin, dawhthei taka la nghak rih turin mipuite a ngen.

Sorkar laipuiin August 5-a Jammu and Kashmir special status-a hlih aṭang khan postpaid mobile service hi Kashmir Valley-ah hian tihtawp a ni. Mobile service leh internet service tihtawp a nih chhan hi thu dik lo leng vel tur venna atana tih a ni. State chhung boruak awmdan an thlithlai hnuah, postpaid mobile service tihnun leh hi thuneitute chuan an rawt ta a ni. Postpaid mobile service tihnun hian Kashmir province-a district 10-te a huam ang. 

Kashmir-ah hian mobile phone hmang mi maktaduai 7 vel an awm a, chung zinga maktaduai 4 chu postpaid connection nei an nih thu thuneitute chuan an sawi. August thla khan Jammu leh Ladakh biala district 12-ah mobile phone service tihnun a lo ni tawh a, a hnuah Kashmir-a Kupwara khuaah tihnun leh a ni bawk. Kansal chuan chuan Jammu & Kashmir-ah hian khuahkhirhna hrang hrang zaa 99 chu tihtawp a nih tawh thu a sawi.