Ayodhya-ah mipui punkhawm khap

Ayodhya-a Ram Janmbhoomi - Babri Masjid ram inchuh thubuai ngaihtuah hun tawp a hnaih tawh avangin, Ayodhya-ah hian mi pali aia tam punkhawm khapna, CrPC Section 144 puan a ni. Kar kal ta Inrinni zan khan punkhawm khapna thupek hi tihchhuah a ni a, December 10 thleng huam tura tih a ni. Hei hi Ayodhya leh mipuite himna tur atana tih a ni a, drone hmanga thla lak pawh khap a ni bawk. 

Supreme Court chuan kar khat chhung Dussehra chawlh a neih hnuah, nimin khan Ayodhya thubuai hi a ngaihtuah chhunzawm leh a ni. Chief Justice of India Ranjan Gogoi kaihhruai judge panga awmna bench chuan August 6 aṭang khan Ayodhya thubuai hi nitin a ngaihtuah a, hearing neih hun tawp ni tura a hmaa lo ruahman, October 18 tih chu ni 17-ah a sawn a ni. October 17-ah hearing zawhfel a ni ang a, November 17-ah Chief Justice chuan thutlukna a puang ang. 

Kum 2010 khan Allahabad High Court chuan Ayodhya ram, acre 2.77-a zau hi pawl pathum, Sunni Waqf Board, Nirmohi Akhara leh Ram Lalla-te chu inzat insem turin a lo relsak tawh a ni. Mahse High Court thutlukna hi duh loin Supreme Court-ah hian appeal 14 zet thehluh a ni.