Pathankot-ah NSG hub siam dawn

Ministry of Home Affairs chuan Punjab-a Pathankot-ah National Security Guard (NSG) hub thar a siam dawn. Hei hi firfiakte laka beihpui thlaknaa chak zawka an chetchhuah theihna tur atana tih a ni. 

Pathankot-a NSG hub siam tur hi a parukna tur a ni dawn a, he hmun hi Indian Air Force (IAF) major base leh defence lam hmun pawimawh eng emaw zat awmna a ni. NSG hub tharah hian NSG Special Action Group, 51 SAG tia sawite chu dah an ni dawn, NSG commando 500 vel a hmun nghetin dah an ni ang. 

Home Ministry lam chuan Pakistan agency-ten Punjab hi tihbuai an tum reng a, firfiakte rawn luhtir dan kawng an dap reng niin an sawi. Indian Army leh Border Security Force-ten Jammu and Kashmir-a Line of Control leh International Border-ah venhimna khauh taka an kalpui avangin, Pakistan lam hian Punjab ramri lam hi an zuam nia sawi a ni bawk. 

Kum 2016 January thla khan Pakistan firfiakte chuan Pathankot-a IAF base hi an bei a, security force-te nen ni thum zet inbei zuiin he inbeihnaah hian Pakistan firfiak paruk leh India sipai pasarih an thi a ni. IAF base beitu firfiakte hi United Jihad Council leh Jaish-e-Mohammad (JeM) mi leh sate an ni.

Kum 2008-a Pakistan fir­fiakten Mumbai an beih hnuah khan NGC hub hi din thar niin, hengte hi Gandhinagar (Gujarat), Chennai (Tamil Nadu), Kolkata (West Bengal), Mumbai (Ma­harashtra) leh Hyderabad (Telangana) ah siam an ni.