J&K-a post-paid connection tihnun hnu lawkah SMS service block

Jammu and Kashmir-ah chuan post-paid mobile phone connection tihnun a nih hnu lawk rei loteah venthawn thilah Kashmir Valley-ah SMS service block a nih lehnghal thu official-te chuan nimin khan an sawi.

Thawhṭanni khan Kashmir-ah hian darkar 72 chhung chu post-paid service hi tihnun leh a ni a, mahse internet erawh tihnun tel a ni lo. Tlai dar 5-ah khan SMS service-te chu dan lehnghal a ni thung. Governor Satya Pal Malik chuan internet service chu tihnun leh thuai a ni dawn tih a sawi a, hetihlai hian security establishment official-te chuan thla hnih vel a la ngaih dawn thu an sawi thung.

Thawhṭanni zan dar 8 velah khan firfiak pawl mi nia hriat pahnih leh Pakistan mi nia hriat mi pakhat chuan Rajasthan truck driver pakhat an kaphlum a, Shopian district-a nauban huan neitu pakhat pawh an vau zui bawk.

Police-te pawhin hemi chungchangah hian thuchhuah siam tawhin mitthi hming pawh hi an tarlang tawh bawk.

Official-te chuan Kashmir-ah hian prepaid mobile phone leh internet service nuai 25 zet chu tihtawp a nih leh rih thu an sawi a, hei hian WhatsApp pawh a huam.