Dengue vangin Bihar-in high-level meeting ko

Bihar chief minister Nitish Kumar chuan Thawhṭanni khan an state-a tuilian vanga "dengue" hri leng chungchang sawi ho turin high-level meeting a ko.

September aṭang khan Bihar khawpui Patna-ah hian dengue natna vei mi 900 chuang ziakluh an nih thu Bihar state health department  thuchhuah chuan a tarlang. State sorkar chuan Thawhṭanni khan hnathawk ṭhat tawk loh vangin official 12-te suspend an nih thu a sawi a, mi 22 hlawh an chelh khawtlai sak bawk. Patna-a tui chiahpiahnaa an duty an thawh ṭhat loh avangin engineer 12-te lakah show-cause notice pek a ni bawk. 

Bihar Chief Secretary Deepak Kumar chuan Patna-a tui chiahpiahna hmuna a hun taka tui pump a nih loh avangin leh, tui paihchhuahna a hun taka tihfai a nih loh avangin action lak a ni, a ti. Bihar hian kuminah ruahsur nasat avangin tuilian a tuar fo a, tuilian hian khawpuiah hnawmhnawk a len lut a, hei hian thosi a ti tam phah a, thosi aṭanga inkai chhawn theih, khawsik natna chikhat dengue chu a len phah a ni.

Ruahsur leh a kaihhnawih avangin Bihar-ah hian mi 73 vel an thi tawh a, ruahsur nasa avanga tuilian hian mi nuai 17.09 vel a nghawng bawk. CM Nitish chuan Patna-a tui chiahpiahna hmuna an tlakchhamte chhui chiang turin committe a din a, thla khat chhungin report CM hnenah hian thehlut turin a ti bawk. Tuichhe paihna luankawrte chu tifai turin a hriattir a ni.