CBI-in Chidambaram bail dilna dodal

Central Bureau of Investiga­tion (CBI) chuan INX Media corruption case-a man, Congress senior leader leh union finance minister hlui P Chidambaram-a'n Supreme Court-a bail a dilna chu dodalin, thuhretute hneh tuma a chet dan finfiahna ṭha tak an nei niin an sawi. 

Nimina CBI aiawha inlan, additional solicitor general KM Nataraj chuan justice R Banumathi kaihhruai bench hnenah, Chidambaram hian a thubuaia thuhretute hneh tuma a beih dan a hrilh. Chidambaram hi August 21 khan CBI hian INX Media case-ah hian a man a, September 5 aṭang khan Tihar Jail-ah a dah a ni. 

Chidambaram chuan Su­preme Court-ah bail-a chhuah dilnaah, CBI-hian amah tih­hmingchhiat leh tihmualpho an tum avangin jail-ah hian an dah niin a sawi.  Kum 74 mi, Chidambaram hi union finance minister a nih laiin INX Media group hnenah Foreign Investment Promotion Board (FIPB) clearance pek danah inrawlhin, a thuneihna dik lo taka  hmanga puh a ni. Hei vang hian CBI leh Enforcement Directorate (ED) chuan kum  2017 aṭang khan an chhui  a ni. 

Nimin khan ED chuan Chi­dambaram hi a tanna, Tihar Jail-ah INX Media case chungchangah a man ve leh. ED chuan local court-in Congress hruaitu hi thu zawhfiah leh, a ṭul a nih chuan man a phalsak tih an sawi. Nimin zing khan darkar hnih vel Chidambaram hi thu zawtfiahin, hemi hnu hian Prevention of Money Laundering Act (PMLA) hnuaiah an man ve leh.

Nimin zing khan Chidamba­ram hi a tanna jail-ah hian a nupui Nalini leh a fapa Karti Chidambaram ten an tlawh. Karti chuan a pa chu a dinhmun a ṭha tih a sawi a, hemi rual a pa chungchang chhui a nih dan chu a lem hle nia a hriat thu a sawi. A pa an puhna chu politics thil, tihchhiat an tumna a ni, a ti.