Rajnath thusawiah Pakistan lungawi lo

Pakistan chu Haryana-a election rally neihnaa defence Minister Rajnath Singh thusawi danah a lungawi lo hle. 

Rajnath Singh chuan "Pakistan hi Jammu and Kashmir-ah hian inrawlh zel mah se, eng chakna (strong) mahin India chu ṭhiahdarh theih a ni lo," tiin a sawi a, hei hi Pakistan chuan a la na hle. 

Pakistan Foreign Office (FO) chuan Rajnath Singh thusawi hi an dem tak zet thu an tarlang a, a thusawi avang hian BJP rilru put hmang a hriat hle tih sawi langin, India chuan ramdang a chaldelhna leh a inlak ropuina a tilang a ni, tiin thuchhuah a siam.

Haryana-a election rally a neihnaah hian Singh chuan Jammu and Kashmir chungchang chu Pakistan hian theihnghilh tawh zawk se, firfiak do kawngah hma la tawh zawk se a duh thu a sawi a ni. India-in firfiak beihna kawnga hmalak dun tura Pakistan a sawmna chu FO hian a hnawl thu sawiin, ramdangte chuan he a thu­sawi hi an hre reng tawh ang, tiin Foreign Office chuan thuchhuah a siam bawk.

August 5-a sorkar lai­puiin Jammu and Kashmir special status a hlih hnu khan, Pakistan hi lungawi thei loin, khawvel ram hrang hrangte ṭanpuina dap mah se Pakistan puih an tum thu eng ram mahin an la sawi lo thung.  

India erawh chuan Ka­shmir chungchang hi ram chhung thil a nih avangin, ramdangte inrawlh a rem loh thu a chhuah ve thung.