Delhi-a odd-even scheme hman hun tur puang

Delhi khawpui boruak bawlhhlawh belh zel tur venna kawng khat leh, traffic tawt tihziaawmna tura  Delhi sorkarin motor number kawpkim leh kawpkim lo a intlanchhawk tir, ood-even scheme chu hman a ni leh dawn. 

Delhi chief minister Arvind Kejirwal chuan nimin khan odd-even scheme hi  November 4-15 chhung hman ani leh dawn tih a sawi a, hei hi ṭum thum an hmanna tur a ni. He scheme hman chhunga dan bawhchhiate hremna pawh a hma aia na zawka siam a ni tih a sawi. 

CM chuan odd-even scheme hman hian state dang aṭanga Delhi lut tur motor te pawh a huam tel vek tih a sawi. Zing dar 8 aṭanga zan dar 8 thleng, Pathianni tih lohah chuan hman a ni dawn a ni. Hemi chhunga traffic rule bawhchhiate chu Rs 4,000 zel chawitir an ni ang. Scheme hman hmasakah khan dan bawhchhiate hi Rs 2,000 chawitir an ni ṭhin. 

Motor number kawpkim leh kawpkim lo intlanchhawkna dan hian chief minister leh minister-te pawh a huam tel vek dawn. Mahse school naupang hruaitu private motor te erawh a huam tel lo thung a, mahse school timing lai chauha an tlan phalsak an ni ang. Two-wheeler pawh khapna hian a huam tel lo a; emergency, enforcement, defence, paramilitary leh embassy motor-te pawh ngaihnathiam an ni ang.