Tripura minister hlui bail dilna hnawl
Eiruk thubuai siamsak, Tripura PWD leh finance minister hlui Badal Choudhury-a'n anticipatory bail a dilna chu District and Session Court chuan a hnawlsak.
West Tripura District and Sessions court judge Sabyasachi Datta Prukayasatha chuan minister hlui bail dilna hi ngaituahin, Nilaini zan zanlai khan hnawl a nih thu a sawi. Choudhury hi Communist Party of India-Marxist central committee member leh MLA nilai a ni.
Court-in anticipatory bail dilna a hnawlsak thu a puan veleh hian Tripura State Rifles (TRS) leh police-te chuan CPI-M Tripura headquarters leh hmun dangah Left hruaitu hi man tumin an zawng nghal a ni. Congress hruaitu hlun leh senior lawyer, Pijush Kanti Biswa chuan Tripura vigilance wing-in Choudhury laka FIR hi belhchian tlak a ni lo tih sawiin, hei hi BJP kaihhruai sorkarin politics lama a hmelma te laka phuba a lak tumna mai a ni, a ti.
Tripura sorkara vigilance wing chuan Pathianni khan Choudhury bakah Principal Secretary (PWD) hlui YP Singh leh PWD chief engineer hlui Sunil Bhowmik-te chu Left Front sorkar lai, kum 2008-2009 a project 13 thawhna tur cheng vaibelchhe 638 tichingpen ṭhenah puhin an lakah FIR a thehlut a ni. Police-te chuan Pathianni zan khan Sunil Bhowmik hi an man nghal a ni.
Law and Education Minister Ratan Lal Nath leh Lok Sabha Member Pratima Bhowmik te chuan Left Front sorkar laia project thawhna tur sum, minister hlui leh official ṭhenkhatin an tihchingpen hi Tripura chanchina sum tihchingpenna lian ber a nih thu an sawi. Minister hlui leh a official-te hian project thawhna tur sum aṭang hian cheng vaibelchhe 228 vel an pawtpeng a ni, an ti.