PMC buaina: Ex-MD Joy Thomas ni 14 hreng dawn

Punjab & Maharashtra Co-operative Bank buaina kal zelah Mumbai court chuan nimin khan Managing Director (MD) hlui Joy Thomas chu ni 14 judicial custody-a dah turin thutlukna a siam.

Joy Thomas bakah hian PMC Bank Director hlui S Surjit Singh Arora pawh October 22 thleng police kuta awm turin Court hian a ti bawk. Mumbai police-te chuan PMC Bank buaina chungchangah hian bank hnathawk dangte pawh thu an zawtfiah leh dawn tih an sawi hnu lawkah Joy Thomas hren a nih dawn thu Court hian a puang a ni. Mi ṭhenkhat chuan thu an zawhfiah turte hi Housing Development Infrastructure Limited (HDIL) director Rakesh leh Sarang Wadhawan-te account nena inzawm account 44 chungchang nena sawizawm theihte an ni tih an sawi a, Thomas nen pawha inhnimhnai takte an nih bakah Rakesh leh Sarang-te account-a pawisa tam tham tak transfer chungchangah pawh inkungkaihna  an nei niin an sawi.

Mumbai Police’s Economic Offences Wing (EOW) chuan HDIL director-te hi an man tawh bawk a ni. PMC Bank-ah hian pawisa cheng vaibelchhe 4,355 zet khawih chingpen a ni a, hemi avang hian RBI chuan PMC-ah hian Rs 25,000 thleng chiah an lakchhuah a phalsak phah nia sawi a ni bawk.

Sarang leh Thomas-te hi Nilaini thleng khan police kuta awm tura tih an ni a, Thomas erawh hi chu ni 14 dang hren zui a la ni dawn ta a ni. Hetih mek lai hian PMC Bank-a depositor 15-te chuan nimin khan an harsatna tawh chungchangah hian prime minister hlui Dr Manmohan Singh Mumbai-ah an hmu ve bawk.

PMC Bank buaina avang hian mi pathum an thi tawh hial a, pahnih hi chu heart attack vang niin, pakhat erawh hi chu amah a intihlum thung. Mumbai Oshiwara branch-a account nei, October 14-a thi ta Sanjay Gulati phei chu Jet Airways thlakchhiat vang khan a hna a chan a, PMC Bank-ah hian a pawisa nuai 90 lai a dah bawk a ni. A fapa rualbanlo enkawlna atan thla tin Rs 25,000 a ngai bawk si a, a rilru buai lutuk chu 'heart attack' vangin a thi ta nia sawi a ni bawk.