CBI-in Chidambaram leh a fapa lakah chargesheet thehlut

Central Bureau of Investigation (CBI) chuan nimin khan INX Media case-ah union finance minister hlui P Chidambaram leh a fapa Karti Chidambaram te bakah midang 12 lakah chargesheet a thehlut. 

Chargesheet thehluhah hian Chidambaram chu finance minister a nih laiin, INX Media hnena  FIPB (foreign investment promotion board)  clearance pek nan a thuneihna dik lo takin a hmang tia sawi a ni. Chargesheet hi Special CBI Judge Ajay Kumar Kuhar court-ah thehluh a ni a, Thawhṭanni hian hearing neih a ni ang. 

Chidambaram-a fapa, Karti Chidambaram chuan chargesheet thehluh chungchang hi sawiin, a pa an hren theih chhung, ni 60  chhung chu a tawp mai dawn avangin CBI hian hren chhunzawm an duh avanga thehluh niin a sawi. Politics lama inbeihnaa pawhluh an ni chu vanduaithlak a tih thu a sawi. Chargesheet-ah hian FIPB official pali vel hming telh a ni bawk a, mahse an hming erawh an puangzar hrih lo. 

P Chidambaram hi CBI hian a man hnuin Tihar Jail-ah dah a ni a, thla khat chuang zet a awm hnuin Ningani khan lakchhuah a ni a, INX Media case-ah vek Enforcement Directorate kutah a awm zui ve leh a ni. ED hian thu zawhfiah turin October 24 thleng an hreng dawn a, hemi chhung hian Tuqhlaq Road-a ED office emaw, Tilak Marg police station-ah emaw dah a ni ang. 

Hetihlai hian Chidambaram chuan an puhnate hi thu dik lo a nih thu sawiin, beih a nih chung­changah politics a inrawlh tih a sawi. 

Chidambaram chuan Ningani khan BJP kaihhruai NDA sorkar chu ram economy chungchangah beiin, thil lakluh leh thawnchhuah a tlahniam zel a, bank credit pawh a tlahniam tawh hle tih a sawi. Hemi awmzia chu thla tinin mi sang telin an hna an chan a,  investment thar a awm lo tihna a ni, a ti. 

Finance miniser hlui hian   a chhungte hnenah pawh India economy chungchang chu tweet tam turin a chah bawk. Hei hi India economy in tlakhniam lam a pan zel vang leh, mipuiten anmahni thua ngaihdan an lo siam thiam nana ti a nih thu a sawi.  Amah pawhin nitin economic indicator pahnih  tweet ziah a tum thu a sawi bawk. 

Nilaini khan thingtlang leh khawpuia India per capita consump­tion expenditure a tlak hniam thu leh, Hunger Index-ah India chu ram 117 zingah rank 102 a nih thu a tarlang. "India-in a lakluh hi 13.9%-in a tla hniam a, a thawn chhuah hi 6.6%-in a hniam bawk a ni. Hemi entir chu India-ah hian thla hnih dan zelah hna 1000 chuang chan belh zel tihna a ni," tiin P Chidambaram chuan a sawi.  

Kumin March aṭanga August thla khan bank pawisa neih chu cheng Rs vaibelchhe 80,000-a a tlakhniam thu, P Chidambaram hian a sawi bawk a, hei hi India-in investment thar a neih loh thu tarlanna a ni, a ti.