Sorkarin Flipkart leh Amazon chhui dawn : Commerce minister

Union commerce minister Piyush Goyal chuan WalMart hnuaia awm Flipkart leh Amazon-te chu 'predatory pricing'-a puh an nih avangin sorkarin a chhui dawn tih a sawi.

Mumbai-a thuthar thehdarhtuten an kawmnaah, Piyush Goyal chuan heng company lian pahnih hnenah hian zawhna an pe tawh tih sawiin an chhanna an ngaichang mek a ni. Heng e-commerce company-te hian an thil zawrhte chu retail sector-ten an chhiatpui tur khawpa man tlawmin an discount ngawt thei lo a, 'potential seller' te leh 'buyer'-te an thlunzawm thei chauh  a ni. Dan bawhchhiatna a awm a nih chuan an chungah hremna lekkawh a ni ngei ang, a ti.

Confederation of All India Traders chuan Commerce Ministry hnenah hian e-commerce firm liante hekna an ziak a, a bik takin heng foreign kuta awm company pahnih- Amazon leh Flipkart-te hi an thailang bik a ni. Hekna lehkhaah hian Amazon leh Flipkart-in anmahni ni lo brand neituten discount an pe ṭhin nia an sawi chungchang pawh chhuichiang tura tihna an ziak tel.

Railway minister ni bawk Goyal chuan Indian Railway Catering and Tourism Corporation (IRCTC) kutah an ticketing arm zawng zawng an hralh dawn nia thuthang awm chu a dik lo tih sawiin, sorkar chuan IRCTC kuta Railway zawng zawng hralh chu a ruahman lo tih a sawi.

(Predatory pricing: Midangte aia thil man tlawm uchuaka chhiar hmanga midang sumdawnna tih­chhiat tumna.)