CJI-in amah thlaktu atan Justice Bobde a rawt

Chief Justice of India Rajan Gogoi chuan sorkar laipui hnenah lehkha thawnin, amah thlaktu atan Jutice Sharad Arvind Bobde a rawt.

Justice Gogoi chuan sorkarin Chief Jutice of India thar tura ruat chungchang hi a buaipui ṭan a ngaih thu leh, CJI thar atan Justice Bobde a duh thu hi a sawi. Justice Bobde hi Jutice Gogoi dawta senior ber dawt a ni. 

Tihdan phung pangngai angin, Chief Justice hian amah thlaktu atana a mi duh hi sorkar laipui hnenah a thehluh ṭhin a ngai a ni. Justice Gogoi hi November 17 hian a pension tawh dawn a, hei vang hian rawtna hi sorkarah a thlen a ni. 

Kum 63 mi, Justice Bobde hi Madhya Pradesh High Court Chief Justice hlui a ni a, kum  2013 khan Supreme Court judge-ah hlankai a ni.  Maharashtra National Law University, Mumbai leh Maharashtra National Law University, Nagpur-ah Chancellor a ni bawk. Kum 2021, April 23-ah a pension ang.