Maha leh Haryana assembly inthlan nei Assembly seat 51 leh LS seat 2 by-election nei bawk

Maharashtra leh Haryana assembly inthlan chu nimin khan neih a ni a, October 24-ah vote tlate hi chhiarin result puan a ni ang. 

Maharashtra-ah hian assembly seat 288 a awm a, candidate 3,237 an awm. Candi­date zingah hian mi hausa tawntaw, crorepati 1,007 zet an awm bawk. Vote thlakna tur polling booth 96,661 siam a ni. Vote nei mi 8.95 an awm. 

Seat 288 zinga seat 29 hi Scheduled Castes tan dah niin, seat 25 chu Scheduled Tribed tan dah a ni. 

Maharashtra-ah hian rorellai,  Bharitya Janata Party (BJP)  leh Shiv Sena  thawkdun 'Mahayuti' tih leh,  Congress leh Nationalist Congress Party thawkdun 'Maha-agadhi' te chu an inbei ber a ni. BJP hian seat 164-ah chuhin, Shiv Sena tan seat 126 a dah thung. Congress party pawhin seat 147 ah chuhin, a thawhpui NCP in seat 121 ah a chuh a, a bak chu an thawhpui party tenaute tan an dah.  

Kum 2014 inthlanah khan BJP chuan seat 122 lain, Shiv Sena-in seat 63 a la. Congress leh NCP chuan seat 42 leh 41 chauh an la pha a ni. 

Haryana-ah hian assembly seat 90 a awm a, candidate 90 awmin polling booth 19,578 siam a ni. Vote nei mi vaibelchhe 1.83 an awm. Seat 90 zinga seat 17 hi SC tan dah a ni a, ST tana seat dah  hran erawh a awm lo.  

BJP leh Congress party chuan seat 90-ah candidate an siam vek. Independent candidate 375 an awm bawk. 

State Electoral Officer Anu­rag Agarwal chuan venthawn ngai zual polling station 3,000 chuangah chuan webcast hman vek a ni tih a sawi a, Chandigarh a control room aṭangin heng polling booth hi vil reng an ni. Inthlanna felfai leh muanawm a awm theihna turin venhim hna thawk turin Haryana police 40,000, paramilitary force 13,000 leh Home guard leh special police officer 20,000 duty tir an ni. Haryana-ah hian BJP, Congress, Indian National Lok Dal (INLD) leh Jannayak Janta Party (JJP) te chu inbei ber tur an ni. 

Kum 2014 assembly inthlanah khan BJP chuan seat 47 lain, INLD in seat 10 leh Congress-in seat 15 an la. Nimin vek khan state 17-a assembly constituency 51-ah by-election neih a ni a, Bihar-a Samastipur leh Maharashtra-a Satara-a Lok Sabha constituency ah by-election neih a ni bawk. 

Assembly by-election neihna hi BJP leh a thawhpuite sorkar mekna, Uttar Pradesh-ah seat 11, Gujarat-ah seat paruk, Bihar-ah panga, Assam-ah pali, Himachal Pradesh leh Tamil Nadu-ah seat pahnih ve ve an ni. Hei bakah hian Punjab-ah seat pali, Kerala-ah seat panga, Sikkim-ah seat pathum, Rajas­than-ah seat pahnih bakah Arunachal Pradesh, Madhya Pradesh, Odisha, Chhattisgarh, Puducherry, Meghalaya leh Telangana-ahte seat khatah ṭheuh by-election hi neih a ni bawk.