Kartarpur agreement naktukah ziak dawn: MEA

Ministry of External Affairs (MEA) chuan naktuk hian Kartarpur agreement an ziak tawh dawn tih an sawi. He inremna hnuaiah hian Kartarpur corridor chu November 12 thleng hawn a ni ang.

India sorkar chuan Pakistan-in he zinkawng zawhtur mi pakhat zela $20 lak a tum erawh ngaihtuah ṭha leh turin an ngen thung. MEA chuan thuchhuah an siamah Gurudwara Kartarpur Sahib tlawh tura zin turten a thlawna visa neih hun rei tak chhung an phut tawh chu thlirin, Kartarpur Corridor a hun taka hawn a nih theihna turin sorkar chuan Kartarpur Sahib Corridor chungchangah hian October 23-a inremna ziah chu an inpeih tawh hle tih an tarlang.

Pakistan sorkar chuan September khan Guru Nanak-a piancham kum 550-na thlen hma ni thum, November 9 aṭangin corridor hi hawn a ni dawn tih an lo tarlang tawh a ni. He corridor hian Kar­tarpur-a Darbar Sahib leh Punjab Gurdaspur district-a Dera Baba Nanak shrine a pawh dawn a ni.