Tractor nuai 1.25 chuangin Delhi border thleng
Loneituten farm law thar duh lohna lantirna atana vawiina Delhi-a tractor rally an buatsaihnaa tel turin Punjab leh Haryana aṭangin nimin khan tractor nuai 1.25 chuang chuan Singhu leh Tikri border an thleng.
Vawiina Delhi border pathum aṭanga rally neih turah hian kaihhruaina fel tak an siam a, trolley telh phal a ni dawn lo a, tractor pakhatah driver leh midang pali bak chuan phal a ni lo ang. Tumah intlan pelh phal a ni dawn lo a, an tlannaah hian vil turin volunteer 2,500 chuang ruat an ni bawk.
Loneitu pawl, Bhartiya Kisan Union, Punjab (Lakhowal Group) General Secretary Harinder Singh Lakhowal chuan rally neih tur atan bik hian discipline committee din a nih thu a sawi. Sanyukt Kisan Morcha chuan rally neih turah loneitute chu tel vek turin an ngen.
Rally-a tel turte chu khua a vawh dawn avangin intuamlumna tur ngaihtuah ṭha tur leh, ei tur leh tui in turte pawh inngaihtuah lawk turin an ti. Loneitu pungkhawmte hi pawl hrang hranga mite an nih avangin an tractor-ah chuan an awmna farmers' organisation flag leh India flag tar turin an ti a, political party flag erawh tar an khap thung. Hmanrua eng mah, tiang takngial pawh ken phal a ni lo.
Delhi border pathum - Singhu, Tikri leh Ghazipur aṭangin rally hi neih a ni dawn a, an kawng zawhna tur hi km 63, 62 leh 68-a thuite an ni. Kawngzawhnaah hian loneitu pawl hruaitute chuan hma an hruai zel dawn a, an tlan chhuah ṭannaah hian an kir leh vek dawn a, kawng lakah chhan ṭha tak nei lo chuan din phal a ni lo ang.
Republic Day-a loneituten tractor rally huaihawt an tum hi sorkar laipui chuan a helh hle a, Supreme Court-ah chuan an thil tum hi dan sak turin ngenna a thlen. Mahse court chuan hemi chungchang hi a thutlukna siamna tur a ni lo tiin, Delhi Police-te thutlukna siam turin a dah a ni. Loneitute pawl aiawhte leh Delhi Police-te an inbiak hnuah police-te hian rally neih hi an remtih sak a, mahse rally an neihna tur kawng bik erawh ruahman sak an ni thung.
Delhi Police-te pawhin tractor rally neih tur hian Republic Day parade a tihbuaina lohna turin venhimna lam pawh khauh takin an kalpui a, Delhi Police Commissioner SN Srivastava chuan officer-te bakah Central Armed Police Forces (CAPF) te chu dan leh thupek khauh taka kengkawh tura inbuatsaih turin a hrilh,