Lockdown vangin mi hausate sum lakluh pung nasa Mi nuai telin an hna an chang thung

Non-profit group Oxfam-in nimina Davas, Switzerland-a World Economic Forum-a report a pharhah, Covid-19 hripui leng vanga hun rei tak lockdown kalpui a nih avangin India ramah mi nuai 1.7 velin an hna an chan a, hetihlai hian India ram mi  hausa tawntaw, billionaire-te hausakna erawh 35% a pung thung tih a tarlang. 

Report hi a thupuiah 'The Inequality Virus' tih a ni a, India ramah lockdown chhunga mi hausate sum lakluh nasa taka a pun lai khan, chhungkaw 84% erawh chu an sum lakluh a tlahniam hle thung a, nikum April thla chhung chauh pawh khan mi nuai 1.7 in hna an chan a ni, a ti. 

India ram pum huapa lockdown kalpui a nih ṭan, nikum March thla aṭang khan India rama billionaire 100-te sum lakluh punna chu, ram puma mi rethei mi maktaduai 138-te  hnenah Rs 94,045 ṭheuhin a sem rual theih a ni, tiin report chuan a tarlang. Lockdown chhunga Reliance Industries chairman Mukesh Ambani-a'n darkar khat chhunga a sum lakluh zat chu unskilled worker chuan kum 10,000 chhungin a lalut tling ve thei dawn chauh nia tarlan a ni. 

Lockdown chhung sum lalut hnem zual, billionaire 11-te chu an sum lakluh punna aṭang hian chhiah 1% chauh pawh pek tir ni se, mipui nawlpui tana damdawi mantlawm zawka an neih theihna tur scheme, Jan Aushashi scheme tana sum dah chu a let 140 zetin a pung thei dawn a ni, tiin Oxfam report chuan a tarlang tel bawk.