China chungchangah Rahul-a'n PM Modi bei

Congress party hruaitu Rahul Gandhi chuan ramri chungchanga China nena buaina neih mekah prime minister Narendra Modi chu beiin, thla eng emaw zat chhung chu PM hian China chungchang hi a sawichhuak tawh lo a ni, a ti. 

China nena buaina neih mekah PM Modi a ngawih reng chhan chu zawtin Gandhi chuan, "China hian India ram chinah a ram a rawn zauh zel a, mahse 'Mr 56' (PM Modi) hian thla tam tak chhung 'China' tih thu ringawt pawh a chhakchhuak tawh lo a ni. 'China' tih chauh pawh sawiin han ṭawngchhuak ṭan leh se," tiin a twitter-ah na takin a kap. 

India ram chakna chu a economy, ṭhalai hnathawk mek leh ram mipuite inngeih tlanna a ni tiin, Rahul Gandhi chuan PM Modi hian a ṭhian mi hausa ho ringawt ṭanpui loin loneitu leh kuthnathawktute chu venghimin humhalh zel zawk se chuan China hi India ram lakah a inluling ngam lo ang, a ti. 

Congress hruaitu chuan Prime Minister chu a lan ropui theih dan tur ngawtah buaiah a puh bawk a, a policy te avangin China chuan India ram pawh a rawn lak ngam phah a, hei hian tualchhungah buaina a thlen phah a ni tiin a sawi.