SC-in Chidambaram bail dilna phalsak

Supreme Court chuan nimin khan union minister hlui, P Chidambaram-an Central Bureau of Inves­tigation (CBI) INX Media case a siamsaka bail a dilna chu a phalsak. 

CBI chuan Chidam­baram lakah hian union finance minister a nih laia INX Media hnena Foreign Investment Promotion Board (FIPB) clearance pek a nih danah a thuneihna dik lo taka hmanga puhin thubuai a ziaklut a ni.

Chidambaram hian Delhi High Court-ah bail dilna hi a lo thehlut tawh a, mahse High Court hian a hnawlsak. Hemi hnu hian Supreme Court-ah dilna thehlut lehin, nimin khan SC chuan bail a dilna hi a phalsak ta a ni. 

Judge pathum - R Banu­mathi, AS Bopanna leh Hrishikesh Roy awmna bench chuan Chidambaram bail dilna hi ngaihtuahin a dilna hi an pawmsak a, cheng nuai khat dahkham turin an ti bawk. Court chuan Chidambaram chu thu zawhfiah tura koh huna inlan thei zel turin an ti bawk. 

Chidambaram bail dilna ngaihtuahnaah hian CBI aiawha ding, Solici­tor General Tushar Mehta chuan thubuai ngaihtuah ṭan a nih hma leh, thuhretute thusawi lakkhawm a nih hma chuan a bail dilna hi pawmsak lo turin a ngen. Hetihlai hian Chidambaram-a ukil, Kapil Sibal chuan court hnenah Chidambaram hian India ram a chhuahsan dawn lo tih a hrilh ve thung. 

CBI thubuai siamsakah Chidam­baram bail dikna hi phalsak ni mah se, En­forcement Directorate chuan INX media case-ah vek a chhui avangin ED kutah a la awm chhunzawm dawn a ni. Supreme Court pawhin bail a dilna hi a phalsak rualin, thubuai dangah hren duhna a awm lo a nih chuan chhuah thei a ni ang, tiin a sawi. Mahse ED hian October 24 thleng Chidambaram kawl theihna hi an la nei a ni.