NCRB data : Hmeichhiate tan UP a him lo ber

National Crime Records Bureau (NCRB) 2017 tih­chhuah thara a lan danin, kum 2017 chhung khan India ramah hmeichhe laka pawikhawihna thleng thubuai nuai  3.59 ziahluh a ni a, Uttar Pradesh-ah tam berin thubuai 56,011 ziahluh a ni. 

Uttar Pradesh chu hmei­chhiate tana state him lo ber nia sawi a nih rualin, Madhya Pradesh chu hmeichhe pawng­sualna thlen tamna ber a ni bawk. Madhya Pradesh-ah hian kum 2017 chhungin pawngsual thubuai 5,562 ziahluh a awm. 

Hmeichhe laka pawi­khawihna thleng thubuai thehluh tam lamah Uttar Pra­desh dawtah Maharashtra awmin thubuai 31,979 ziahluh a ni a, West Bengal-ah thubuai 30,002 ziahluh a ni bawk. Delhi khawpuiah chuan a kum thumna atan a zawnin hmeichhe laka pawikhawihna thubuai ziahluh zat a tlahniam a, thubuai 13,076 ziahluh a ni. 

Hmeichhe laka pawikhawih­na tih hian - tualthah, pawng­sual, mo chhawm kaihhnawiha kut inthlak leh inthah, mahni intihhlum duhna nei khawpa tihduhdahna tawk, acid hmanga beih, rawng taka kutthlak leh rukbo te a huam tel tih report chuan a tarlang. Kum 2016 khan India ram pumah hmeichhe laka pawi­khawihna thubuai ziahluh nuai 3.38 a awm a, kum 2015-ah thubuai nuai 3.2 ziahluh a ni bawk.