Parliament ṭhutkhawm hmain Congress-in nawrh huaihawt tum

Ram economy din­hmunin ṭhat lam a pan loh avangin, eptu pawl Congress chuan Parliament thlasik ṭhut­khawm hma ngeiin rampum huap nawrh huaihawt an tum. 

Parliament thlasik ṭhut­khawm hi Novem­ber 18 aṭangin neih a ni dawn a ni. Congress hian No­vember thla kar hmasa berah rampum huapin nawrh huaihawt hi an tum a, eptu pawl dangte pawh nawrh huaihawt an tumah agenda siam ve turin an hriattir bawk ang. A bik takin Delhi-ah sorkar laka lungawi lohna lantirna liantham tak chu buatsaih an tum a ni.

September 12 khan Congress chuan ram economy dinhmunin hniam lam a pan avangin, October 15 aṭanga 25 thleng nawrh huaihawt an tum thu an lo sawi tawh a ni. Mahse Maharashtra leh Haryana-a assembly election a awm avangin leh, diwali festival a awm dawn avangin an ṭhulh leh a ni.

Prime minister Narendra Modi-a kaihhruai NDA sorkar chuan policy dik lo tak hmanga ram an kaihhruai avangin, ram economy dinhmun hi a chhe mek a ni, tiin Congress chuan thuchhuah an siam. Hemi chungchangah hian Rahul Gandhi leh Prime Minister hlui Manmohan Singh pawh an lo ṭawngchhuak tawh a ni. Tihar jail-a tang mek Congress hruaitu hlun P Chidambaram pawhin, India economy dinhmun chungchang chu Twitter-ah tweet tam turin a chhungte a chah tawh bawk.