PoK-ah JeM launch pad tichhia Firfiak 18 kaphlum

Indian security agency official chuan October 19 leh 20 khan Pakistan Occupied Kashmir (PoK)-a hmun pathumah leh Neelun Valley-ahte India sipaite chuan firfiak 18 an kaphlum tih sawiin, Pakistan sipai pawh 16 an kaphlum tel tih a sawi.

Official chuan heng hmunahte hian terror launch pad eng emaw zat an tichhe tel bawk, hengte hi Jaish-e-Mohammed leh jihadist dangte launch pad a ni tih a sawi. India sipaite hian Line of Control-a Pakistan lamin silai an hmehpuah chhanletna turin beihpui an thlak a ni.

Army Chief General Bipin Rawat pawhin Pathianni khan hemi chungchanga an hmalakna  hi defence minister Rajnath Singh hnenah a hrilhfiah tawh a, Rajnath Singh chuan terror launch pad pakhatmah zuah lo tura tiin, pawi sawi loten nunna an chan lohna tura fimkhur turin a chah bawk.

Defence ministry official, a hming tarlan duh loh hian Pakistan sipaite ralthuam leh ration lakna pawh an tichhia tih sawiin, Neelum Valley bikah hian terror launch pad pali tichhiain, Jura, Athamuqam leh Kundalshahi-ahte pawh an tichhe bawk a ni.

Pakistan sipaite hian Karnah sector-ah India sipai leh civil mi pakhat Inrinni zan khan an kaphlum a, hemi hnu hian India sipaite hian beihpui an thlak chhunzawm ve nghal a ni. Jammu and Kashmir-ah hian tunhnaiah firfiak 60 vel zet chu India sipaite hian an luhchhuah tawh a, 500 vel luhchhuah an la tum bawk.