Maha leh Haryana assembly inthlan result puang Maha-ah rorellai chak, Haryana-ah Sorkar siam thei an awm lo

Maharashtra leh Haryana assembly inthlan result chu nimin khan puan a ni. Hemi rual hian state dang 17 leh union territory pakhata assembly leh Lok Sabha by-election result pawh puan nghal a ni.

Maharashtra-ah chuan rorellai,  BJP leh Shiv Sena-ten sorkarna an siam leh thei dawn a, mahse party pahnihte thawkdun hian kum 2014 inthlan aiin seat an la tlem zawk. Assembly seat 288 awmah, BJP-Shiv Sena hian seat 160 an la a, inthlan hmaa seat an lak zat tura an beisei seat 250 erawh an pha lo hle. Sorkarna siam tur hian seat 145 neih phak a ngai. 

BJP chu an beisei aiin an che ṭha lo hle a, party mala majority siam theih an inrin laiin seat 103 chiah a la pha a, Shiv Sena chuan seat 57 a la bawk. Congress leh a thawhpui, Nationalist Congress Party chuan sorkarna siam pha lo mah se, inthlan hmasa aiin hma an sawn thung. Party pahnih thawkdunte hian seat 99 an la pha a, an chet ṭhatna chhan pakhat hi NCP hotu Sharad Pawar thawhrim vang nia sawi a ni. 

Assembly seat 90 awmna, Haryana-ah chuan party mala sorkar siam thei an awm lo. 

BJP in seat 40 lain, Congress in seat 31 a la. Jannayak Janta Party (JJP) chuan seat 10 a la a, independent-in seat 7 lain, Haryana Lokhit Party leh Indian National Lok Dal-in seat khat ve ve an la bawk. Sorkar siam turin seat 46 neih phak a ngai dawn a ni. 

Haryana-ah hian rorellai BJP chuan inthlan hmasa an pha lo hle bawk a, seat sarih zetin an pha lo a ni. Hetihlai hian Congress chuan hma sawnin, seat 17 zetin a pung thung. Ṭangrual sorkar din a ngaih dawn avangin JJP chu an dinhmun a pawimawh hle dawn a, BJP chuan JJP hi thawhpui turin sawm a tum nia sawi a ni. 

State 17 leh union territory pakhata assem­bly seat 51 leh Lok Sabha seat pahniha by-election result pawh puan nghal niin, BJP an la che ṭha chhun­zawm zel. Assembly by-election hi  Punjab (seat 4), Kerala (5 ), Sikkim (3), Rajasthan (2 ) leh Arunachal Pradesh, Madhya Pradesh, Odisha, Chhattisgarh, Puducherry, Meghalaya leh Telangana-a seat khat ṭheuhah neih a ni.

Assembly seat 30-ah BJP leh a thawhpuite an chak a, Congress-in seat 12 lain, a dang chu tualṭo party-ten an la. Bihar-a Lok Sabha seat khata by-election neihah Lok Jan Shakti Party a chak a, Maharashtra-a seat khata inthlan neihah Nationalist Congress Party a chak bawk.