Ayodhya-a mosque sakna tur atan trust din ve phut

National Congress Party (NCP) hotu Sharad Pawar chuan sorkar laipui chu Ayodhya-a Ram Temple sak tur buaipui tur trust a din ang bawkin, mosque sakna buaipui tur trust din ve turin a phut. 

Uttar Pradesh khawpui, Lucknow-a thu a sawiah, NCP hotu chuan sorkar laipui hnenah temple sakna tura tana trust a din theih laia, mosque tana trust a din ve loh chhan a zawt. "India ram hi mitinte ta a ni si a," a ti. 

Hetih lai hian sorkar laipuiin Shri Ram Janmabhoomi Teerth Kshetra Trust a dina member-te chu Nilaini khan a vawi khatna atan Delhi-ah an inhmukhawm. Meeting-ah hian trust hotu atan Mahant Nritya Gopal Das chu thlan niin, VHP senior leader Cham­pat Rai chu general secre­tary atan thlan a ni bawk. 

Nikum November thla khan Supreme Court chuan hun rei tak Hindu leh Muslim-te buaina, Ayodhya-a ram an inchuh thubuai chu rel felin, an ram inchuhna lai acre 2.7-a zau chu Ram Temple sakna turin a pe a, hemi rual hian muslim-te tan mosque sakna tur ram acre 5-a zau chu pe turin sorkar a hriattir bawk a ni. 

Ayodhya-a Ram Temple sak tur buaipui tur hian February 5 khan `Shri Ram Janambhoomi Tirath Kshetra`din a nih thu prime minister Narendra Modi chuan a puang.