BJP MLA lakah pawngsual thubuai thehlut

Uttar Pradesh-a BJP ticket-a tlan tlin Bhadohi bialtu MLA Ravindra Nath Tripathi leh a chhungte 6 chu hmeichhe pawngsuala puh an nih avangin, police-te chuan an lakah hian FIR an thehlut.

Pawngsual tawk nia insawi hmeichhia hian Varanasi-a Superintendent of Police (SP) Ram Badan Singh chu hmuin, a thil tawn chungchang hi a thlen a, kum 2017-a UP state assembly inthlan lai vel khan pawngsual a nih thu chu Singh hnenah hian a sawichhuak ta a ni.

Police lam chuan a rang thei ang bera he thil tleng hi chhui tumin hma an la nghal a, IPC hnuaia section 376 D, 313, 504, 506-te kaltlanga thubuai siamsak an ni. Thil sual titu nia puhte lakah hian FIR thehluh fel a nih tawh tih SP Singh chuan sawiin, he thil thleng hi chhui mek a nih thu a sawi bawk.

Pawngsual tawktu hian MLA Ravindra Nath Tripathi-a unau fa Sandeep Tripathi nen kum 2014-a Mumbai-a a zin ṭumin relah an inhmelhriat thu a sawi a, hemi hnu hian ṭhianṭha tak an nih bakah an inngaihzawng zui a ni. "Sandeep hian inneiah miin tiama, mahse min nei siloin vawi tam ka zaawmna min khawihchhiatsak a ni. Tichuan kum 2017-a UP state assembly lai vel khan Bhadohi khuaah Sandeep hian zin turin min ti a, rinhlehna pawh nei loin ka zin ve mai a, Bhadohi khuaa hotel-ah chuan min tlen tira, he hmunah hian MLA Ravindra Nath Tripathi leh a fapate leh Sandeep-te chuan ni hran ṭheuhin min pawngsual ta a ni," tiin Pawngsual tawktu chuan pawnsual a nih dan chungchang chu SP Singh a hrilh.