Haryana-ah BJP kaihhruai sorkar ding dawn

Haryana assembly inthlan neih zawh taka party mala sorkarna siam thei an awm lo. Mahse independent MLA paruk chuan seat la hnem ber, BJP chu thlawp an tum thu an sawi tak avangin BJP kaihhruai sorkar a ding leh dawn ta a ni. 

Haryana assembly seat 90-ah BJP hian seat 40 a la a, sorkar siam turin seat 46 neih phak a ngaih vangin midang thlawpna a ngai a ni. Congress chuan seat 31 lain, Dushyant Chautala's Jannayak Janta Party (JJP)-in seat 10 a la bawk. 

Inthlan result puan hnuah sorkar siam dan tur ngaihtuaha meeting hrang hrang neih a nih hnuah, independent MLA pasarih zinga paruk chuan phut let nei loin BJP chu thlawp an tum thu an sawi ta a ni. Nimin zing khan state BJP hruaitu leh chief minister Manohar Lal Khattar chu party hotu liante be turin Delhi-ah a kal nghal a ni. BJP working president JP Nadda leh party Haryana in-charge Anil  Jain-te hmuin, Haryana sorkar thar din dan turte a sawipui ang.