Kashmir chungchangah SC-in sorkar laipui zawhna zawt

Supreme Court chuan Ningani khan Jammu and Kashmir-a sorkar laipuiin  khuahkhirhna a kalpui mek chu eng chen nge a kalpui dawn tih a zawt.

Judge pathum awmna Justice N V Ramana kaihhruai bench chuan inbiakpawhna tihtawp chungchangah pawh solicitor general hnenah zawhna zawtin ennawn a hun tawh tih a sawi a, "Thla hnih a ni tawh a, eng chen nge khuahkhirhna hi in kalpui dawn?" tiin zawhna a zawt.

Solicitor general Tushar Mehta hian Kashmir Valley-a area 99%-ah chuan khuahkhirhna an siam lo niin a lo sawi tawh a ni. Justice Ramana chuan zawhna mumal tak nei turin a ti bawk. SC hian Ningani khan Kashmir chung-changa petition lut hrang hrang a ngaihtuah a, heng zingah hian Kashmir Times executive editor, Anuradha Bhasin thehluh- August 5-a Article 370 paih a nih aṭanga Kashmir Valley-a inbiakpawhna chungchang khinna a thehluh pawh a tel. Bench chuan November 5-a hearing neih leh turin thutlukna a siam.

Justice Subhash Reddy pawhin Mehta hnenah hian ram tana ṭha tur a nih chuan khuahkhirhna siam chu a ṭha tho a, mahse ngun taka ennawn fo a ṭul tih a sawi. Mehta pawhin nitinin an ennawn dawn tih a sawi ve bawk.