Shaheen Bagh : SC palaite'n nawrh huaihawtte an hmu

Shaheen Bagh, New Delhi-a  Citizenship Amendment Act (CAA) duh lohna lantira nawrh huaihawtte hnena palai tura Supreme Court-in a tirhte chuan Nilaini khan nawrh huaihawtte hi an hmu a, hmun danga nawrh huaihawt tura inremna siampui an tum.

SC hian palai tur hian mi pathum a ruat a, heng mite hian thla hnih chuang nawrh huaihawt tawhte hi an hmu a, mahse an zinga ṭhenkhat chuan chhunzawm zel an tum thung. 

Court hian advocate pahnih- Sanjay Hegde leh Sadhana Ramachandran-te chu palai tur hian  a ruat a, information commissioner hlui leh IAS officer ṭhin Wajahat Habibullah chu thawhpuia sawm turin a ti bawk.

Sanjay Hegde chuan nawrh huaihawtte hnenah hian SC thupek anga kal an nih thu leh buaina chinfel chu an beisei tih a sawi a, mipui chu thawhpui turin a sawm a ni. February 24-ah Shaheen Bagh chungchanga hearing chu Court chuan a nei leh ang.

Nawrh huaihawtte lakah hian advocate Amit Sahni chuan Public Interest Litigation (PIL) a thehlut a, hemi vang hian SC hian palai tur hi a ruat a ni. PIL thehluhah hian Shaheen Bagh-a nawrh huaihawtte hian dan loin vantlang kawng, Delhi leh Noida inkalpawhna chu an dang tih leh hei hian veivakte tan harsatna a thlen tih a inziak.

Ramachandran chuan duh lohna lantir turin dikna chanvo an nei tih hrilhin, CAA pawh SC-ah khin a ni tih a sawi. "Keini ang bawkin, midang pawhin dikna chanvo an nei, kawngpui hman leh an dawr hawn thuah pawh dikna an nei. In dikna chuan midang a nek chep tur a ni lo. Ngaihthlak che u kan duh. Kan thawh ho chuan buaina kan chinfel ngei ang a, chu chu India mai ni lo, khawvel tan pawh entirna ṭha tak a ni ngei ang," tiin a sawi.

SC hian a hmain duh lohna lantirtute chuan an duh chuan nawrh an huaihawt thei a, mahse vantlang kawng erawh an dang thei lo tih a lo sawi tawh a ni.