Haryana CM atan Khattar lalut

Haryana chief minister, Bha­ratiya Janata Party (BJP) hruaitu Manohar Lal Khattar chu nimin khan a term hnihna atan Chief Minister atan rinawmna thu tiamtir  a lakluh a ni. 

Haryana-ah hian BJP hian party malin sorkarna siam thei lo mah se party ding thar, Dushyant Chautala kaihhruai Jannayak Janta Party (JJP) nen ṭangrual sorkar siam turin inremna an siam a ni. JJP hotu Chautala chu deputy chief minister atan lakluh a ni bawk. 

Kar kal ta Zirtawpni zan khan JJP hotu Chautala hian BJP president Amit Shah chu hmuin, party pahnihte thawhdunna turin inremna an siama ni. Governor Satyadeo Narain Arya chuan Chandigarh-a Raj Bhawan-ah Khattar leh Dushyant te hi rinawmna thu a tiamtir a, minister turte erawh lakluh an la ni ve lo. 

BJP hian assembly seat 90-ah seat 40 a la a, sorkar siam turin seat 46 neih phak a ngai a ni. Seat 10 neitu JJP leh independent MLA pasarihten an thlawp tak avangin, BJP kaihhruai sorkar hian assembly-ah thlawptu 57 a nei ta a ni. 

Chief minister chuan a cabinet turte a la puang lo a, mahse council of  minister-ah hian BJP aṭangin paruk leh JJP aṭangin pahnih, independent MLA pakhat an awm dawn nia sawi a ni. Nimina CM thar lakluh inkhawm hi union minister leh BJP senior leader eng emaw zatin an telpui. 

Deputy chief minister Chautala pa, Ajay Chautal chu dik lo taka zirtirtu lakna thubuaiah thiam loh chantir ni tawhin Tihar Jail-ah a tang mek. Mahse nimin zing khan kar hnih chhung a chhuah lailawk phalsak a ni a, a fapa lakluhnaah pawh a telpui a ni. Ajay leh a pa, Haryana chief minister hlui Om Prakash Chautala te hi kum 18 kaltaa dik lo taka zirtirtu 3,206 lakna­ah thiam loh chantirin kum 10 tang tura hrem an ni a, kum 2013 aṭang khan jail-ah dah an ni.