India-in US leh Russia military drill neihpui dawn

India chuan khawvel ram ropui pahnih United States leh Russia-te chu November leh December thla velah hian military exercise neihpui a tum nia tarlan a ni. 

Exercise hi tri-service format (army, navy leh air force)-a kalpui tum a ni a, hei hi a hlawhtling a nih chuan India leh US hian tri-service format exercise an vawi khat neihna tur a ni dawn a, Russia nen erawh a ṭum hnihna a ni thung ang.

India leh US tri-service military exercise neih tur hi 'Tiger Triumph' tia a hming vuah niin, India khawchhak lam tuipui kamah November thla hian neih tur a ni dawn a, Russia nen erawh hi chuan December thlaah khawthlang lam tuipui kamah an nei thung dawn a ni.

Official pakhat chuan ram lian pahnih military drill an neihpui tur hi, India chu ṭha a tih angin a kal a, US leh Russia a thawhpuina kawngah pawh a zalen a ni tih entirna tur a nih thu  a sawi. India leh US hian army-to-army, navy-to-navy leh air force-to-air force military drill an nei tawh a, Russia nen ve thung hi chuan October 2017 khan Vladivostok-ah joint tri-service exercise an lo nei tawh a ni. 

France pawh tri-service format exercise neihpui tur hian India hian a bia nia sawi a awm bawk. Russia hi India hnena ralthuam hralh tam ber niin, 2014-18 chhunga India ralthuam a lakluh 58% zet chu Russia aṭanga a lak hi niin Stockholm-based think tank chuan a tarlang.

US hi pathumna ni thungin India ramthuam lakluh 12% chu US aṭangin a ni thung.