J&K-in sum hloh hnem

Kashmir Chamber of Commerce and Industry (KCCI) chuan sorkar laipuiin Article 370 a tihtawp avanga hrekna hrang hrang Jammu and Kashmir-a a siam avangin, thla thum chhungin cheng vaibelchhe Rs.10,000 hloh a nih thu an tarlang.

"Tunlaiah chuan internet hmanga sumdawnna leh hmasawnna tam tak hi kalpui a ni a, thla thum chhunga internet a awm mumal loh avangin J&K chuan a tuar a ni. A sum hloh zat pawh tam tak niin, kawng hrang hranga ei leh bar zawngte tan harsatna a thlen nasat bakah, nakin zel atan a la nghawng zel dawn a ni," tiin KCCI president Sheikh Ashiq chuan a sawi. 

Internet hmangin sumdawnna hi an kalpui nasa a, J&K-a internet mumal a awm loh avang hian sumdawngten an tuar nasa a ni. Kut themthiamte'n Kristmas leh kumthar vuakveta an sumdawnna kalpui ṭhinte chu, internet a awm mumal loh avanga order an hmuh ṭhat loh avangin, harsatna an tawk chho dawn chauh niin a lang. Hei hian  kut themthiam mi 50,000 chuang zet chu hna nei loin a siam rin a ni bawk.

Sumdawnna piah lamah hian sorkar laipuiin hrekna hrang hrang Jammu and Kashmir-a a siam avangin, GST leh online return lamah pawh harsatna a thlen a ni. "Heng thil zawng zawng hi a mawhphurtu chu sorkar laipui a ni a, tu nge heng thilte hi min ngaihtuah sak ang," tiin Sheikh Ashiq chuan a sawi.