EU palaiten PM an hmu Vawiinah J&K tlawh dawn

European Union palai, mi 28-te chuan India rawn tlawhin, nimin khan New Delhi-ah prime minister Narendra Modi leh National Security Advisor Ajit Doval an hmu a, Jammu and Kashmir chungchang an sawipui. EU team hian vawiinah J&K hi an tlawh dawn a ni. 

Kar kal ta khan Washington-a US Congressional meeting-ah J&K chungchang hi an lo sawiho tawh bawk a ni. Member ṭhenkhat chuan India sorkarin J&K special status pekna, Article 370 a tihtawp sak leh, state a nihna ṭhiat a union territory pahniha a ṭhendarh chungchangte sawichhuakin, he thilin state chhunga nghawng ṭha a lo neih dante an sawiho a ni. 

Acting US Assistant Secre­tary of State, Alice Wells chuan US state department-in J&K-a Article 370 tihtawp kaih­hnawihah sorkarin political lea­der-te pawnchhuak thei loa a hren zui chungchang chu India sorkar pawh a sawipui tawh a ni a, a ti. Pawnchhuak thei loa hren zingah hian J&K chief minister hlui pathum an tel. 

"India ram hruaitute chu mihring dikna chanvo neihte zah sak tur te, J&K-a dan pangngaia service kalpui leh vek tur te, a bikin internet leh mobile service-te pawh tinung vek turin kan ngen a ni," a ti. US chuan J&K chungchanga India sorkar chetdan chu ramchhung thil, pawn lam mi inrawlhna tur ni lo nia a ngaih thu a lo sawi tawh. Hetihlai hian sorkar laipui pawhin ramdangte hnenah pawh J&K-a boruak ṭha a awm theihna turin theihtawpin hma a la zel tih pawh a hrilh ve reng bawk.