Pakistan-in a ram van boruak PM Modi hman phal lo

Thla hnih chhunga a ṭum hnihna atan Pakistan chuan Pathianni khan prime minister Narendra Modi-a'n Saudi Arabia a tlawhna tura a ram van boruak tantlang India sorkarin a dilna chu a hnawl.

Pakistan foreign minister Shah Mahmood Qureshi chuan Jammu and Kashmir-a mihring dikna chanvo nasa taka palzut a nih avangin prime minister Narendra Modi chu an ram van boruak hman an phalsak lo tih a sawi. Indian High Commission hnenah pawh hemi chungchang hi ziakin an thlen dawn niin a sawi bawk.

Narendra Modi hian nizan khan ni hnih cham turin Saudi Arabia pan a tum a ni. Hemi atan hian Pakistan van bourak hi tantlang hi dil a ni. Modi hian Saudi Arabia ram hruaitute inbiakna a neihpui dawn a, Saudi Crown Prince Mo­hammed bin Salman pawh inbiakna a neihpui ang.

India leh Saudi hian India-Saudi Arabia Strategic Partnership Council dinna turin inremna an ziak dawn a, he council hi Modi leh Saudi Crown Prince-te hian an kaihruai ang. Modi hian Future Investment Initiative-ah thu a sawi bawk dawn a ni.

Pakistan hian September-ah khan PM Modi thlawhtheihna chuanna chu a ram tantlang a lo phal lo tawh bawk a, UN General Assembly, US-a neiha Modi a kal dawn khan India dilna a lo hnawl tawh a ni. September thlaah vek president Ram Nath Kovind-a thlawhtheihnain an ram van boruak a tantlang dilna pawh a lo hnawl tawh bawk.

February-a Jaish-e-Mo­hammed (JeM) terrorist training camp, Balakot ami Indian Air Force-ten an beih hnu aṭang khan Pakistan hian India tan a van boruak chu hman a phal tawh dawn loh thu, thuchhuah siamin a lo tarlang tawh. Mahse July 16 khan civil mite tan an hawng leh tawh a ni.

June thlaa PM Modi-a'n Bik­shek-a SCO Summit a hman dawn khan Pakistan hian a van boruak hman hi a phalsak thung.