Shiv Sena leh BJP la inrem thei lo Shiv Sena hi Chief Minister Post kan tiam lo: Fadnavis

Maharashtra assembly inthlanah Shiv Sena leh BJP ṭangrual pawl chu thlan tlin ni mah se, tun thlengin sorkar thar a la ding thei lo. Shiv Sena leh BJP te hi chanvo insem dan turah an la inrem thei lo. 

Shiv Sena hian sorkar thar siam turah chanvo hi 50:50 a insem an phut thar leh a, hei hi BJP lam hian an la pawmpui thei lo. Party pahnihte hian a hran ve vein state Governor pawh an lo hmu tawh bawk. 

Chief minister Deven­dra Fadnavis chuan kum nga chhung chief minister a ni leh dawn tih sawiin, kumin Lok Sabha inthlanpui neih hmaa Shiv Sena nena thawhdunna tur an siam khan, CM post inchelh chhawk a, kum hnih leh a chanve ve party pahnihten inchelh chhawk tur angin an sawi lo a, engmah tiam an nei lo tih a sawi.  

Maharashtra assembly seat 288-ah BJP hian seat 105 lain, Shiv Sena  hian seat 56 a nei a ni. Inthlan result hi October 24 khan puan ni tawh mah se, rorellai party pahnihte an la inbiakfel theih loh avangin sorkar thar a la ding thei lo a ni. 

BJP chuan sorkar thar siam dan tur ngaihtuahin party president leh union home minister Amit Shah-an October 30-a Shiv Sena hotu Thackeray hmuh a ṭum chu ṭhulh a ni leh rih tih an sawi a, mahse party pahnihte hian informal meeting erawh an la nei chhunzawm zel dawn tih a sawi. 

Sena hruaitu Sanjay Raut chuan sorkar thar siam tura thawhpui dang zawn ngai khawpin BJP chuan a nawr tur ani lo tiin a vau a, politics-ah chuan tumah 'mithianghlim' an awm lo tiin a sawi bawk. Raut chuan BJP nen thawhdunna an siam tawh chu  Shiv Sena chuan a ringtawk a, mahse BJP hian  thil ṭha lo ti a, thawh­pui tur dang zawng turin a nawr chep thei a ni tih sawiin, hetiang thil hi thleng tura an duh lo thu a sawi nghal bawk. 

Hetihlai hian BJP chuan indepenent MLA 15-te thlawp­na an nei sa tawh tih a sawi ve thung.