Kum 9 chhungin Maoist-ten mi 3700 vel that: MHA
Maoist helten kum kua kal ta chhunga state hrang hrang 10-a pawikhawihna hrang hrang an thlenah mi 3700 vel zet an thi niin Ministry of Home Affairs chuan a tarlang.
Ministry of Home Affairs hian kumtina a tih ṭhin angin 2018-19 annual report a tichhuak a, hetah hian Communist Party of India (Maoist) helte chu ramchhunga Left Wing Extremist outfit, pawikhawihna thlen hnem ber niin pawikhawihna thleng 88% zet chu an thlen a ni tih tarlan a ni. Chhattisgarh-ah pawikhawihna hi an thlen nasa ber bawk.
Report-a a lan dan chuan 2010 hnu lamah state 10-ah tharum thawhna 10,660 a chhuak a, hetah hian mi 3,749-in nunna an chan a ni. Chhattisgarh bikah ringawt mi 1,370 an thi a ni. Naxal-ten pawikhawihna an thlenna state tarlante chu Chhattisgarh, Jharkhand, Bihar, Odisha, West Bengal, Maharashtra, Telangana, Andhra Pradesh, MP leh UP-te an ni.
Maoist hel pathum that
Thawhṭanni khan Maoist nia hriat mi pathum chu Kerala Palakkad district-a Attapady bulah thah an ni a, hmeichhe pakhat a tel tih police-te chuan an sawi. Palakkad district-a ramhnuaiah police-te patrol neih lai chu helte hian lo kapin, police-te hian an kap let ve nghal a, heng mi pathumte hi an kaphlum a ni.