CJI atan Sharad Arvind Bobde ruat

President Ram Nath Kovind chuan nimin khan Justice Sharad Arvind Bobde chu Chief Justice of India (CJI) thar atan a ruat.

Justice Bobde hi November 18-ah thu tiam tira lakluh a ni ang. Thla 18 chhung, kum 2021 April 21 thleng he dinhmun hi a chelh ang. Chief Justice of India nilai  Ranjan Gogoi hi November 17-ah a pension tawh dawn a,amah thlaktu tur Justice Bobde hi Chief Justice of India 47-na tur a ni.

Maharashtra-a Nagpur-ah Bobde hi kum 1956 April 24 khan a  piang a, SFS College Nagpur aṭanga a gra­duate hnuah Nagpur University aṭang­in Law a zir chhuak. Hemi hnu hian kum 2000 khan Bombay High Court-ah additional judge a ni a, 2012 khan Madhya Pradesh High Court-ah Chief Justice hna a chelh bawk.

Kum 2013 aṭangin Supreme Court-ah judge hna a chelh ṭan a ni. Ayodhya temple-mosque buaina chungchangah te, BCCI case leh firecracker hman khap chungchanga thubuai ngaihtuahtute zingah Bobde hi a tel a ni. Tihdan phung pangngai angin, Chief Justice nilai hian amah thlaktu atana a mi duh hi sorkar laipui hnenah a thehluh ṭhin a, Law minister chuan Prime Minister hnena thlenin, a tawpah President hnena thlen a ni ṭhin.

CJI dawta judge senior ber ruat a ni ṭhin bawk.  Yeshwant Vishnu Chandrachud chu CJI ni rei ber niin, kum 7 leh thla 4 chhung a ni a, Kamal Narain Singh hi CJI ni reilo ber niin, ni 17 chauh a ni thung. Anni pahnih hi CJI 16-na leh 22-na an ni.