Jammu and Kashmir : Union Territory pahnihah ṭhen hran a ni ta

Vawiin aṭang hian India chuan thil thar a tawng a, Jammu and Kashmir, state puitling ni ṭhin, chu Union Territory pahnihah ṭhen hran a ni ta. India rama state awm zat chu pakhata kiamin union territory thar pahnih a pian belh thung.

Gujarat-a  bureaucrat ṭhin G C Murmu chu J&K UT-a lieutenant governor hmasa ber a ni dawn a,  Radha Krishna Mathur chu Buddhist tamna ram, Ladakh-ah lieutenant governor hmasa ber a ni thung ang. Ladakh UT hian assem­bly hran a nei dawn lo a, Union Home Ministry-in direct-in a awp dawn a, Kashmir erawh hi chuan assembly hran a nei dawn thung a, Delhi nen an kal dan phung a inang dawn hle. Jammu and Kashmir Reorganisation Act, 2019 pawh tihchhuah vat a ni ang. 

Thil chhinchhiahtlak tak chu zalenna sualtu lar ber zinga mi leh India home minister hmasa ber Sardar Vallabhbhai Patel piancham, National Unity Day-ah tak UT pahnih an piang hi a ni. Sorkar laipuia rorellai, BJP hian May thlaa Lok Sabha inthlanna neih a nih dawna an campaign auhla, J&K special status Article 370 tihbo chu August 5 khan a tihlawhtling a ni.

J&K statehood laksaka UT pahnihna ṭhen a nih tur hi chu ram pum hriat ni tawh mah se vawiin aṭang hian a takin kalpui a ni dawn ta. Buaina erawh a la chhuak reng a, a khat tawhin sipai kahhlum leh firfiak kahhlum a nih thu report a la awm reng bawk.

Vawiin hian G C Mur­mu leh Radha Krishna Mathur-te hian an charge thar hi an la dawn a, an office an luah ṭan dawn a ni.