EU Panel-in J&K-ah eptu hruaitute kal phalsak an duh

European Union MP rual, Kashmir tlawhtute chuan India ram ṭhianṭha tak an ni tih sawiin, India sorkarin remna a awm theihna atana a hmalakna leh, firfiaka chetna tibo tura a hmalakna chu an thlawp tih an sawi. Hemi rual hian sorkar chu J&K-a eptu hruaitute an kal phalsak tura an duh thu an sawi. 

EU palaite chuan Article 370 chu India ramchhung thil a ni tih an pawm thu sawiin, an ngaihven ber zawk chu khawvel pum pawhin a buaipui, firfiakte chetna thleng ṭhin chu a ni tih an sawi. Tunhnaiah Kashmir-ah firfiakten hnathawktu mi panga an that chu pawi an tih thu leh an dem thu an sawi nghal bawk. 

Kashmir-ah chuan thil thlen dan dik tak hre tura kal an nih thu leh, an theih anga puih an duh thute an sawi. Remna leh muanna a awm theihna tura an puih theih dan turte an hmu duh tih an sawi a ni. EU team zinga mi, Nicolaus Fest chuan sorkar laipuiin Kashmir Valley chu eptu party hruaituten  an tlawh a phalsak ve a ngai tih a sawi a, "EU MP-te luh in phalsak chuan, India rama eptu pawl hruaitute pawh in luh tir ve a ngai a ni. Intluktlan lohna awm hi sorkar chuan a ngaihtuah a ngai a ni," a ti. 

Hetihlai hian Kashmir mipuite chuan sorkar laipuiin EU MP-ten an state tlawh a phalsak chu hming tihṭhat a tumna mai niin an sawi thung a, MP rualte hi khawtlanga mi pawimawhten an hmuh phalsak an ni chuang lo, an ti. 

Eptute pawhin ni 80 chuang zet J&K hi hrekbeh an ni tawh tih sawiin, thil awmdan dik tak thup tumah sorkar laipui chu an puh. 

Pakistan Federal Minister for Kashmir Affairs and Gilgit Baltistan, Ali Amin Gandapur chuan eng ram pawh Kashmir chungchanga India thlawptute chu missile hmangin kan kap dawn a, Islamabad hmelma an ni bawk ang, tiin a sawi.

Gandapur thusawi lai vedio hi Pakistan-based journalist Naila Inayat-i'n a twitter-a a tarlan hnuah, social media hrang hrangah a darh chak hle a ni.

European Union palaiten J&K an tlawh vangin Pakistan chu a lungawi lo hle a, J&K chungchanga India chetdan chu a dik loh thu leh mimal zalenna inrahbehna a nih thu khawvel hriatah a tlangau pui fo bawk. Ramchhung thil a nih thu India hian a sawi fo a, India hi ram hrang hrangin an thlawp mai bakah, SAARC ramte leh Arab World ram te chuan India hi an thlawp a ni. Jammu and Kashmir special status pekna Article 360 ṭhiah a nih hnu hian, kawng hrang hrangah Pakistan leh India hi an la innghirngho reng a ni.

September thlaa New York-a UN General Assembly neihah khan, Pakistan prime minister Imran Khan chuan Kashmir chungchang hi minute 50 vel sawiin, "Ram pahnihte innghirnghona hi a san chho zel chuan eng thil pawh a thleng thei a ni. India aia te zawk Pakistan hian engtin nge a tih chuan ang? India lakah hian kan inpe dawn nge kan zalenna turin kan sual dawn? Ka mimal ngaihdan chuan kan zalenna turin a tawp thlengin kan bei ang," tiin UN palai kalkhawmte hmaah a sawi.