India-in Covid-19 vaccine a ngah Vaccine la ngam lo an la tam

India ramah khawvela  vaccination programme lian ber tur zinga pakhat kalpui mek a ni a, Covid-19 vaccine sem chhuah tur pawh a ngah tawk a, hetih lai hian thawh khatnaa vaccine la tur zinga mi, healthcare leh frontline worker zingah vaccine lak hreh hi eng emaw zat an awm nia sawi a ni. 

Covid-19 vaccine hi pahnih, Covishield leh Covaxin hman mek a ni a, January 16 aṭang khan ram pumah a thawh khatna tur hi  pek chhuah ṭan a ni. Mahse vaccine la hi an beisei dan angin an pung chak lo a, January 25 thleng khan vaccine pek thawh khatnaa la turin a huam zingah 56% chauh pek an la ni thung. 

Sorkar chuan kumin July thlaah chuan India ram mipui hmun lia ṭhena hmun khat, mi maktaduai 300 vel hnenah vaccine hi pek hman a tum. Mahse tuna vaccine lak dan ngaihtuah chuan a target hi a pha dawn lo nia ngaih a ni. All India Institute of Medical Sciences (AIIMS) Patna-a resident doctor, Vinod Kumar chuan an doctor zinga 40% vel chuan vaccine chungchangah an ngaih a la ngam chiah lo a, nghah rih an duh zawk niin a sawi. India ramah doctor leh healthcare worker-te indaih lohna a nasat hle laia vaccine enchhinna atana hman hmasak an ni chu thil awmze nei lo tak nia a ngaih thu a sawi bawk. 

AIIMS, Delhi-a Resident Doctors Association member, Adarsh Pratap Singh pawhin an institute-a mi eng emaw zat chuan Covaxin lak chu eng ang takin nge a ṭhat dan tur an hriatchian loh avangin lak an phur lo tih a sawi. Mipuiten an rinngam theihna turin sorkar chuan data, trial neih a nih dante chiang takin a tarlan a ngai a ni, a ti. Mahse he vaccine siamtu, Bharat Biotech leh sorkar laipui chuan a him tawk niin an sawi a, clinical trial pawh dik taka neih a nih thu an sawi. 

Sorkar laipui chuan healthcare worker-te chu vaccine hi la vek turin a ngen a, union health minister Harsh Vardhan chuan vacine chungchangah thuthang dik lo tak tak a awm tih sawiin, heng avang hian lo buai phah lo turin a ngen.

Niti Aayog member VK Paul pawhin heath worker zinga vaccine rinhlelhna leh lak hrehna awm chu tawp se a duh thu a sawi a, hri leng mek hi eng angin a rawn awm zel dawn hriat a ni lo tih sawiin, India-a hman tura pawm vaccine pahnihte chu a him Ṭha tawk a, amah ngei pawhin Covaxin a la tawh a, nghawng ṭha lo engmah a chungah a thleng lo tih a sawi a ni.