Loneitu pawl hruaituten boruak tha siam turin ngen

Loneitu pawl hruaitute chuan farm law thar pathum duh lohna lantira nawrh huaihawt mek, loneitute chu buaina chawk chhuak zawnga awm lo a, boruak ṭha tak siam turin a ngen. 

Republic Day khan loneitute hian farm law duh lohna lantirin Delhi-ah tractor rally an buatsaih a, mahse rally an neihna hmun ṭhenkhatah buaina chhuakin, loneitute leh Delhi police-te chu nasa takin an innawr a ni. Buaina chhak vang hian police 300 chuangin hliam an tuar a, thubuai 22 ziahluh a ni bawk. Thubuai ziahluhah hian loneitu pawl hruaitu eng emaw zat hming ziahlan a ni a, hei bakah hian conspiracy case pakhat pawh ziahluh a ni bawk tih police-te chuan an sawi. 

Hetih lai hian loneitu pawl hotute chuan buaina siamtute lak aṭang hian inlahrangin, he thil hi an thil phut mek chungchangah an hming tihchhiat tuma phiarna niin an sawi thung. Hruaite Ṭhenkhat chuan buaina chawk chhuak a, Red Ford-a Sikh sakhaw hnam puanzar zar a nih chungchangah Punjabi actor leh activist Deep Sidhu chu mawhphurtuah an puh. "Deep Sidhu hi sorkar hmanrua a ni a, hetianga inphiarrukna hi kan hriatthiam a ngai a ni. Heng mite hian engtinge Red Fort an thlen a, eng vangin police-te pawhin an kal tlang tir theih?" tiin Red Fort-a mawi lo taka chete chu phatsantute an ni tih an sawi. 

Nimin khan loneitu pawl hruaitute hian Singhu border-ah meeting neiin, an hma lak zel dan tur an ngaihtuah. Tractor rally neihnaa loneitute leh Delhi police-te inkara buaina chhuak vang hian Thawhlehni zan khan union home minister Amit Shah chuan high-level meeting a ko nghal a, Delhi khawpui chhungah paramilitary force dah belh an rel.