Modi-a sorkar kaihhruaina Ṭhat loh vangin economy tlahniam - Manmohan Singh

Prime minister hlui leh economist lar, Manmohan Singh chuan ramchhung economy dinhmun tlahniam chu kawng hrang hranga prime minister Narendra Modi kaihhruai NDA sorkar inenkawl dan ṭhat tawk loh vang tih a sawi. 

Gross Domestic Product (GDP) chungchang sawiin, Congresss hruaitu chuan hun rei tak tlahniam reng thei dinhmunah kan awm mek a ni, a ti. 

Ram economy dinhmun chu ngaihtuah ngai tak, ngaihṭhatthlak lo tak a ni tih sawiin, PM hlui chuan quarter hnuhnung bera GDP growth rate 5% chuan dinhmun ṭha lo taka kan ding mek tih a lantir tih a sawi. Singh chuan India chu hei aia growth rate ṭha leh chak zawka awm turin theihna a nei tih a sawi, mahse Modi-a sorkar enkawlna dik tawk loh avangin hetiang dinhmun hi thleng a ni, tiin a sawi.

PM hlui chuan manufacturing sector dinhmun chu a manganthlak hle tih sawi bawkin, manufacturin sector growth rate chu 0.6% chauh a ni tih a sawi. Pawisa note lian pahnih tih thih leh Goods and Services Tax (GST) hmanin tun dinhmun hi a thlen tih Congress hruaitu chuan a sawilang bawk. "Ngaihtuahna seng lo taka pawisa note tithih ngawt leh hmanhmawh rum ruma GST hmanin kan economy a nghawng chu tun thlengin a la insiamṭha pha lo a ni, " a ti. 

Kar kal ta Zirtawpni khan sorkar laipui chuan quarterly GDP report a tichhuah a, growth rate hi 5% a ni a, financial year hmasaa hetiang huna growth rate chu 7.8% a ni.