Union cabinet-in medical college thar 75 dinna tur pawm

Cabinet Committee on Economic Affairs (CCEA) meeting, kar liam taa neih chuan ramchhunga medical college 75 din tharna tur a pawm. Medical college din thar turte nen hian India rama MBBS seat awm zat chu 15,700 a tling thei tawh dawn a ni. 

CCEA chuan medical college tharte hi kum 2021-22-ah din a ni dawn tih sawiin, district leh referral hospital awmsaahte dah an ni dawn tih a sawi. Medical college thar 75 dinna tur hian cheng vaibelchhe 24,375 a ngai dawn a ni.

India ramah hian medical college 529 a awm mek a, hengah hian MBBS seat 70,978 a awm.

Cabinet meeting hian loneitute sum lakluh tihpun a nih theihna turin, financial year hman mek chhungin fu ton nuai 60 vel thawnchhuah a rel bawk. Hemi kawnga loneitute chawh phurna turin export subsidy cheng vaibelchhe 6,268 chu sorkarin a pe dawn bawk a ni. Heng sumte hi loneitute account-ah transfer sak an ni dawn tih Commerce and Industry Minister Piyush Goyal chuan a sawi. 

Prime minister Narendra Modi chuan sorkar laipuiin ramchhung hmun hrang hrangah Ayush centre 12,500 din a tum tih a sawi bawk. Heng zinga centre 4,000 chu kumin chhunga din hman tum a ni. PM chuan Ayust field-ah mi tam zawkin eizawnna an neih theihna turin sorkar chuan hma a la mek tih a sawi a ni. 

Chhiatna thleng thei laka invenna tur lo inbuatsaihna turin cabinet chuan International Coalition for Disaster Resilient Infrastructure (CDRI) din a remti bawk. Prime minister Narendra Modi chuan September 23-a New York-a UN Climate Summit neih hunah CDRI hi a hawng ang.