Lalu Yadav dinhmun ṭha lo

Bihar Chief Minister hlui leh Rashtriya Janata Dal (RJD) hotu Lalu Prasad Yadav-a hriselna dinhmun chu a ṭha lo hle a, a kal (kidney) chu 37% vel chauhin hna a thawk thei tawh. 

Kum 71 mi, Lalu Prasad Yadav hi chief minister a nih laia ranchaw man tihchingpen thubuaiah thiam loh chantirin, kum 14 tang tura hrem a ni tawh a ni. Kum 2017, December 23 khan Ramnchi jail-ah dah a ni. Mahse a hriselna ṭhat loh vangin jail aṭangin Ranchi, Jharkand-a damdawi-inah enkawl mek a ni. 

Rajendra Institute of Medical Science (RIMS)-a Lalu enkawltu, Dr PK Jha chuan Lalu-a kal(kidney) hi 63% a chhe tawh a, 37% chauhin hna a thawk tih sawiin, kar kalta chhung khan a dinhmun hi a ṭha lo hle ti a sawi. Dr Jha chuan Lalu hian kal natna a neih bakah, zunthlum, thisen sang leh natna hrang hrang a neih tel thu a sawi. 

Lalu-a fapa, Bihar deputy CM hlui Tejashwi Yadav chuan Inrinni khan a pa hi tlawhin, a pa dinhmun chu a ṭha lo hle a, enkawlna ṭha zawk pek a mamawh thu a sawi. 

A hriselna dinhmun ṭha lo hle tawh mah se, Lalu hian Bihar-a ṭangrual pawl an siam, Grand Alliance lam a la buaipui hle. A fapa pawh hemi chungchang hi sawipuiin, Jharkhand-a assembly inthlan lo awm tura pawh Congress leh Jharkhand Mukti Morch nena thawkho a, inthlan chuh turin a ti a ni.