Sikkim sorkarin luxury car lilam dawn

Sikkim chief minister PS Golay kaihhruai sorkar chuan sorkar hmasa hunlaia luxury car leite chu a lilam dawn. 

Chief minister political secretary Jacob Khaling chuan sorkarin inrenchemna a kalpuina peng pakhat atan luxury car 50 chuang lilam a ni dawn tih sawiin, heng zingah hian Toyota Land Cruiser Prado, Toyota Fortuner leh Jeep Compass-te pawh a tel tih a sawi. 

Assembly inthlan dawna a campaign-naah khan Golay chuan,thuneihna an chang a nih chuan sorkar hmasaa minister leh MLA-te motor leite chu ambulance-ah siam an ni dawn tih a sawi a ni. Mahse expert hoin an enfiah hnuah, heng motor ṭhenkhat hi ambulance anga siam theih an nih loh avangin lilam an tum ta zawk a ni. 

Chief minister atana lakluh a nih hnu lawkah, Golay chuan minister leh MLA-te pawhin luxury car an hman loh tur hi a sawi nghal. Cabinet meeting hmasa ber neih a nih hmain CM hian minister leh MLA-te chuan India siam SUV chauh an hmang dawn tih a puang bawk. 

Khaling chuan sorkarin inrenchemna a kalpui aṭang hian, state annual budget cheng vaibelchhe 7,000 aṭanga 10% vel chu an hum theih a rin thu a sawi. Sorkar official meeting pawh sorkar building-ah ngei neih zel tawh tura tih a ni. A hma chuan central lam aṭanga palai kalte leh sumdawng liante chu luxury hotel-ah meeting neihpui ṭhin an ni a, mahse hei hi titawpin sorkar buildingah zel neihpui an ni tawh a ni.