E-passport-ah 'chip' dah dawn

Ministry of External Affairs (MEA) hmalaknain security venthawn thilah e-passport-ah 'chip' dah tum a nih thu Regional Passport Officer (RPO) Bharath Kumar Kuthati chuan a sawi.

Passport hmansual emaw a bo thu hlaah emaw, he 'chip' hmang hian passport neitu document kimchang a chhui chhuah leh theih dawn a ni, tiin Bharath Kumar Kuthati chuan a sawi bawk.

E-passport-a 'chip' dah turah hian Security Printing and Minting Corporation-in mawhphurna a la dawn a, a hmaa passport nen a len lam leh tet lamah a danglam thui dawn lo bawk. He thil hi hmalak zawh a nih hunah passport renew leh turte hnenah chuan 'chip' awmna passport pek chhuah an nih tawh dawn thu RPO chuan a sawi.

India rama IT hmunpui a nihna angin Bengaluru-a Regional Passport Office chuan, 'chip' telna passport chu an pe chhuak hmasa ber dawn em? tih zawhna chu Kuthati chuan chhangin, India ram hmuna Passport Office hrang hrang aṭanga pek chhuah theih a nih dawn thu a sawi a, an tih fel theih hun tur hi sawi mai theih a la ni lo a ni, a ti.