J&K-a khuahkhirhnate thlahdul an ni thuai ang : S Jaishankar

External affairs minister S Jaishankar chuan Jammu and Kashmir-a khuahkhirhna hman mek chu thlahdul an ni thuai dawn tih a sawi. 

Brussels-a Politico chanchinbuin a kawmnaah, Jaishankar chuan prime minister Narendra Modi kaihhruai NDA sorkarin Jammu and Kashmir special status pekna, Article 370 a titawp chu fakin, hei hi J&K bialin economy lama hmasawnna zau zawk a neih theihna tur kawng awmchhun a ni, a ti. 

Jammu and Kashmir dinhmun thar chuan sumdawng liante aṭangin investment tam zawk a hip thei dawn tih sawiin, Kashmir economy chak lo tak kha ramri paltlanga rawn lut ṭhin, firfiakten an hmang ṭangkai a ni, tiin a sawi. 

Pakistan prime minister Imran Khan-a'n Kashmir chungchanga India nena inbiakna neih a duh thu a sawi chu Jaishankar chuan a pawm lo tih a sawi. Pakistan-in firfiak a thlawp leh, sum hmanga a puihna ṭhinte a tihtawp phawt loh chuan inbiakna hi neih theih a ni lo ang, a ti. 

J&K boruak hian ziaawm lam panin, boruak pawh a pangngai chho thuai dawn tawh nia sawi ni mah se, nimin thleng khan Kashmir politician, August 5-a Article 370 tihtawp a nih dawn vanga house arrest-a hrente chu chhuah an la ni lo. Politician ṭhenkhat chu an chenna inah hren an nih laiin, ṭhenkhat chu Centaur hotel-ah hren an ni thung. Centaur hotel-ah hian mi 37 vel hren nia sawi a ni a, an zingah hian Jammu and Kashmir People's Conference chairman Sajjad Lone pawh a tel a, National Conference hruaitu Ali Mohammad Sagar leh minister hlui Imran Reza Ansari-te pawh an tel a ni.